“Ayrılmaq qərarımdan zərrə qədər də peşman deyiləm” – Emil Babayev

Azərbaycan millisinin qapıçısı Emil Balayev Qazaxıstan “Tobol”undan ayrılmasına münasibət bildirib.

İnterval.Az goal.az-a istinadən xəbər verir ki, 26 yaşlı qolkiper “İnstagram” hesabında Kostanay təmsilçisini bir neçə gün öncə rəsmən tərk etdiyini xatırladıb.

O, ötən il ərzində bu klub və şəhərə çox alışdığını vurğulayıb: “Bu klubda daha da inkişaf edib, Qazaxıstan Premyer Liqasının ən yaxşı qapıçıları siyahısına düşdüm. Milli komandamızda da debütüm məhz bu klubun şərəfini qoruduğum vaxt baş tutdu”.

Balayevin sözlərinə görə, ötən mövsümün sonunda bir daha “Tobol”da oynamayacağını ağlına belə gətirməyib. Qapıçı bu il “sarı-yaşıllar”ı tərk etməsini komandaya erməni əsilli Qriqori Babayanın baş məşqçi təyin edilməsi ilə əlaqələndirib:

“Yeni baş məşqçinin təyinatı sonrası, təbii ki, futbolçu kimi gələcəyim bir çoxlarını maraqlandırırdı. Mən isə məlum səbəblərlə əlaqədar komandanı tərk etməyə qərar verdim və bu qərardan zərrə qədər də peşman deyiləm”.

Azərbaycanlı qolkiper sonda ona dəstək olan hər kəsin ünvanına xoş sözlərini çatdırıb: “Klubun rəhbərliyinə minnətdarlığımı bildirmək istərdim. Çünki onlar məni başa düşüb, problemsiz müqaviləyə xitam verməyə razı oldular.

“Tobol”un bütün azarkeşlərinə “sağ olun” deyirəm. Kluba gəldiyim ilk gündən mənə dəstək oldular. Hətta indi belə, yazıb, sevgilərini hiss etdirirlər.

Bütün kollektivimizə, komanda yoldaşlarıma, personala təşəkkürümü bildirirəm, sizin hər birinizlə işləmək xoş idi. Kostanay və kostanaylılar barədə məndə yalnız gözəl xatirələr qalacaq. Hər şeyə görə çox sağ olun!”

Emil Balayevin “Tobol”la daha bir il qüvvədə olan müqaviləsinə bir neçə gün əvvəl xitam verilib.


Bütün xəbərlər