Portuqaliya gimnastları Bakıda qızıl medal qazandı

Akrobatika gimnastikası üzrə 28-ci Dünya çempionatında Portuqaliya gimnastları Rita Ferreyra və Ana Teyşeyra qadın cütlüklər arasında ümumi hərəkətlər proqramında qalib gələrək qızıl medallara layiq görülüb.

Interval.Az xəbər verir ki, cütlük 28,780 xal toplayıb.

Dorina Bernat və Noem Stattner (Macarıstan) 26,950 xalla ikinci, Aleksandra Rudakova və Damira Talqat (Qazaxıstan) 26,790 xalla üçüncü olub.

Qeyd edək ki, martın 10-13-də Milli Gimnastika Arenasında akrobatika gimnastikası üzrə Bakıda ilk dəfə olaraq dünya çempionatı keçiriləcək. Yarışlarda 17 ölkədən 170 gimnast iştirak edəcək.

4 gün davam edəcək yarışlarda idmançılar qadın, kişi və qarışıq cütlükləri, eləcə də qadın və kişi qrupları proqramlarında balans, temp və qarışıq hərəkətlər üzrə çıxış edəcəklər.

Yarışda ölkəmizi gənclər arasında Avropa çempionları Daniel Abbasov və Murad Rəfiyev kişi cütlüyü tərkibində təmsil edir. Qarışıq cütlüklər tərkibində isə beynəlxalq turnirlərin qalibləri Sabir Ağayev və Mehriban Salamova, Avropa çempionatının gümüş və bürünc mükafatçıları Ağasif Rəhimov və Raziyə Seyidli mübarizə aparacaqlar.

Xatırladaq ki, 2018-ci ildə ölkəmiz ilk dəfə akrobatika gimnastikası üzrə Dünya kubokuna, bu il martın 3-dən 6-dək isə bu növ üzrə 12-ci Dünya Yaş Qrupları Yarışlarına ev sahibliyi edib.

Interval.Az


Bütün xəbərlər