Bakıda Azərbaycan Gimnastika Federasiyasının İcra Komitəsinin iclası keçirilib

Bakıda Azərbaycan Gimnastika Federasiyasının (AGF) İcra Komitəsinin 34-cü iclası keçirilib.

İnterval.Az Trend-ə istinadən bildirir ki, ilin yekunlarına həsr olunmuş iclasda AGF-nin vitse-prezidenti Altay Həsənov, İcra Komitəsinin üzvləri Mariana Vasileva, Rafiq Behbudov və Rauf Əliyev, eləcə də federasiyanın baş katibi Nurlana Məmmədzadə və gimnastikanın müxtəlif növləri üzrə yığma komandaların baş məşqçiləri iştirak edib.

İlk olaraq iclasda batut gimnastikası üzrə 2019-cu ildə Tokioda keçirilmiş Dünya Yaş Qrupları Yarışlarında medal qazanmış idmançılar – Aleksey Karataşov, Hüseyn Abbasov, Maqsud Mahsudov və onların məşqçiləri – Adil Hüseynzadə, Vladimir Şulikin və Abdulla Qasımov mükafatlandırılıb.

Azərbaycan Gimnastika Federasiyasının vitse-prezidenti Altay Həsənov idmançıları və onların məşqçilərini təbrik edib, onlara daha böyük idman uğurları arzulayıb.

Sonra iclasın gündəliyində duran məsələlər müzakirə olunub.

AGF-nin baş katibi Nurlana Məmmədzadənin, gimnastika növləri üzrə yığma komandaların baş məşqçilərinin, həmçinin federasiya ilə sıx əməkdaşlıq edən idman təşkilatlarının 2019-cu il üzrə hesabatları dinlənilib və müzakirələrdən sonra qəbul edilib.

İclasın gündəliyində duran əsas məqamlardan biri Beynəlxalq Gimnastika Federasiyasının qaydalarına əsaslanaraq, milli yarışların proqramlarına uyğunlaşdırılmış AGF-nin Texniki Reqlamentinin müzakirəsi və təsdiq edilməsi olub.

О cümlədən, AGF-nin 2020-ci ilin əvvəllərində keçiriləcək Ümumi Yığıncağının tarixi müəyyən edilərək təsdiq olunub.

Bundan əlavə, AGF-nin 2020-ci il üzrə planları barədə müzakirə aparılıb.


Bütün xəbərlər